Келерча гӀалашка дӀахьоча балхашка хьежар
ГӀалгӀайчен ОКН лораеча паччахьалкхен комитета кулгалхо Коазой Т.У., иштта ЖӀайрахьа-Эса-ЧӀожерча музея-заповедника кулгалхочун декхараш кхоачашдеш вола Сампенаькъан А. А. баха хилар Келерча гӀалашка дӀахьош долча балхашка хьажа, яхаш, дийцар «Сердало» газетага ГӀалгӀай Республикан министрий кабинето.
«ГӀалаш меттаоттаяра балхаш дӀахьош да «АСМ Группа» говзанчаша, еррига республикан Паччахьалкхен проектно-ахчан каьхаташ чӀоагӀдаь хилара бокъонаш а боарам а чулоацаш, из хьаллоац «САФМАР», «Меттаоттадар» яхача дика гӀулакхаш леладара йолча лоадама ганзаша.
Балхага хьежачул тӀехьагӀа, гуш хилар, цунца кхоачамбоацараш доацилга, историко-архитектурни тӀехьале лораяра балхаш чӀоагӀа лорадеш хьаделга. Уж дераш ба дика кхеташ бола говзанчаш.
Белгалду, Келе ягӀа гӀалаш ЦӀай-Лоама хозача моттиге йолга. ХьалхагӀа, тохкамхошта укхаза тамашийна археологе хӀамаш кораяьяр: кхарташ йола кхера, пхиъ малхара каш. Лоаман ГӀалгӀайчено кхы а цкъа гӀаддига Ӏергдац вай, ший тамашийнача хозалца, къайленашца.
