Гуйран-Iан хана йIовхал лоаттаеча моттигашка хьожаш ба мехка
Вай мехкадас Келаматанаькъан Махьмуд-Iаьлас тIадилла, тIайоагIача шелалга кийчо е, йIовхал лоаттаеча моттигий хьал меттадоаладе болабеннаб мехка. Из хоам «Сердалога» бир мехкадаь зарбан болх лелабераша.
«ЙIовхал лу гIирсаш хьалсагар эттача хаоттамга хьежжа хургда. Ардара бутт бIайха хуле а, цу беттарча 15-ча дийнахьа цу оагIонцара болх тоабаь, кийча хила безаш ба. Таханарча дийнахьа цун кечам 80%-га кхоачаш ба. Цу гIулакха бехктокхаме барашта тIадиллад; массайолча моттигашка чакхдоалаш, шелалга кийчо еш болх дIахьо, аьнна.
Из лоархIаме гIулакх да, хIана аьлча, кийчо ярга хьежжа хургда квартирех латтача цIеношка, кхыйолча моттигашка йIовхал лоаттаяр», - аьлар вай Мехкадас. Цо белгалдечох, Минэнерго беча хоамах, лоа дIадоаха машинаш кийчъеш, котельнеш, хий малагIча хьале да хьожаш, ша ца бижийта тувсаш бола маркхал кийчбеш, шоай болх дIахьош ба уж.
Иштта боаггIача боараме бахархошта газ, хий, ток хургйолаш массайолча моттигашта тIахьожаш ба. Къаьстта йоккха терко йир хьакимаша газаца болх беш йолча муниципальни котельнешта. Нагахьа хатар нийсденна моттиг хуле, АЗСашца бартчIоагIам баьб, цар газ лоаттаергйолаш.
Белгалде деза, дIадахача шера шелалга кийчо еш бола болх мехка боаггIача боараме дIабихьалга.
