«Хьаькъал дола цӏа» яхача оагӏонцара гӏирсаш оттадеш болх ба мехка дӏахьош
26.09.2025 14:47
«Хьаькъал дола цӏа» яхача оагӏонцара цӏи яьлча хоам беш дола гӏирсаш, газацара датчикаш наьха цӏеношка увттаеш болх ба тахан мехка дӏахьош. Укх наькъа из болх Яндарерча вӏаштӏардаьча цӏеношка дӏабахьа арабаьлар Наьсарен кхален администраце ГО, ЧС оагӏон болхло Эккажанаькъан М., ОНД а, ПР а воккхагӏа вола болхло Дахкилганаькъан М.
Кхерамзлен хьал лорадара тӏехьа дӏахьош ба из болх, хӏана аьлча цу гӏирсашта нахал хьалхагӏа хоалу цӏи йоалаш, газ хьаухаш хилча.
«Цу балхо дикка аттача доаккхаргда наьха хьал. Къаьстта цӏераш ювлаш йола ха хьаоттача хана, геттара лоархӏаме да уж оттаяр», - аьлар Наьсарен кхале.
