ГӏалгӀай мехка дӀахо а наьха цӀеношта газ дӀатӀахьош дола балхаш дӀахьу
ГӏалгӀайче дӀахо дӀахьош да цӀенош деш боахкача наха газ дӀатӀахьош дола балхаш. ГӏалгӀай республикан Кулгалхочун, Паччахьалкхен зарбан болх лелабераша аьлар, из болх кердабаьккха хиларах.
Газа турба юхе бахача наха мах боацаш из чуюлларгья, нагахьа санна цар хьалххе а дехар чуденна хиннадале.
Саькура бутт юкъекхоачаш, республикан бахархоша газ тӀехьара тӀа чуйиллара язадаь хинна дехараш дар 1403. Тханарча денга кхоачаш, из чуйилла яьннай 1124 цӀагӀа, газ дӀахоттара балхаш дӀадихьад 512 цӀагӀа.
ГӏалгӀайчен кулгалхочо Келаматанаькъан Махьмуд-Ӏаьлас белгалдир, газ чуйиллара болх сихагӀа дӀабахьа йиш я, нагахьа санна цӀенош доаггӀача тайпара хьатӀаяздаь хуле.
«Из болх адресах, отчетаца бе безаш ба, тӀаккха тха бокъо я газ чуйиллара йолча программа юкъе уж бахийта», - аьлар цо.
Иштта белгалде деза, цхьацца паччахьалкхено денна аьттонаш долаш болча наха (льготаш), цу юкъе СВО доакъашхой а болаш, РФ Паччахьалкхено субсидеш лу газ чуйиллара бола гӀирс эца а из чуйилла а. Цу гӀулакха лаьрхӀа федеральни бюджетера хьахьожадаьд 3,5 млн сом.
