Вайцига дӀахьош ба «Музее - ахкан каникулаш» яха болам
ГӀалгӀай къам мехкахдаккхара дагалоаттама Мемориала комплекса гойтама зале, «Музее - ахкан каникулаш» яха акци дӀахьош я. Ишкола даькъ тӀарча лагерашка салоӀаш дола бераш, иштта берий беша ухаш дола бераш укх деношка каст-каста хул музея болхлой болча хьоашалгӀа.
«Укх деношка оаха дика тӀаийцар Наьсарен-Шахьара №19 йолча юкъерча ишкола, иштта №10 йолча юкъерча ишкола къона новкъостий, хоза хеташ дийцар царна дӀаяхача ханара истори», - аьлар «Сердало» газетага музея болхлочо.
ГӏалгӀайчен берашта лаьрхӀа дӀахьоргья, ахкан каникулаш йолаш, экскурси. Из дика таро я шоай хьамсарча мехка культура, истори, шоашта ховш дар кӀоаргагӀа довза.
Экскурсеш дӀахьу говзал йолча хьалхабаьнна лелача наха, цар дувц ГӏалгӀайчен таханара, дӀаяхача ханашкара вахар, иштта дикагӀа довзийт сурташ, каьхаташ, кхыдола гӀирсаш, цунца цхьана царна дикагӀа довз шоай къаман истори.
