Интернете гӀолла доаржадеча довнашта духьалара кхетаче дӀайихьар мехка
Интернете гӀолла доаржадеча цатоамашта, кибербуллинга духьалара проект я вай мехка тахан дӀахьош. Из дувца гулбеннабар тайп-тайпарча ханага кхаьча бахархой.
«Кхетачен керттера декхар - интернета оагӀонашка довнаш хьалхьедеш, цатоамаш доаржадеш долча воча гӀулакха духьале лоаттаяр, цу хӀаман духьале еш бола болх вӀашагӀболлар.
Буллинга бахьанех, иштта цу ийрчача гӀулакхо къонача тӀехьен сакхетама деча зенах дийцар кхетаче», - йоах «Сердалога» бенача хоамо. ЛоархӀаме дакъа дӀалоацаш бар цига Ӏаьдала болхлой, иштта кхетаче гулбеннабар студенташ, дешархой. Шоай вахаре цу оагӀонца нийсденнарех дийцар кагирхоша.
Гулбеннараша белгалдир, интернете даьржача цу вонна духьала блогераша болх дӀакхахьа безилга. ВӀаший деш дола къамаьл лерхӀам болаш, эздел лорадеш, барт, машар боаржабеш хургдолаш, къахьега деза тахан блогераша интернета оагӀонашка.
