Укхаза го йиш яр дукха тайп-тайпара халкъа дувхараш, царца лелаю куц доаккхаш йола хӀамаш. ГӀалгӀай къаман культуран тӀехьале ма ярра гойташ бола гӀирса кхоачам бар цига хиннар.

Кхетаче баьхкача наха юкъе дукха кагирхой бар; ГӀалгӀайчен Ӏадатий, культуран лоархӀаме дакъа дӀалоац цар; кагирхошта хозала оагӀув дӀаялара, из хьалхаяккхара терко лоаттае еза.

«Гойтаме баьхкарий таро хилар, цига дакъа лоацаш хиларал совгӀа, говзанч-хьехам го, кулгаговзал йовза, халкъа халхарга хьажа, иллешка ладувгӀа.

Къаман дувхар-из духхьал барзкъа хинна Ӏац, из да вай къаман истори, Ӏадат, культура хьагойташ йола оагӀув. Халкъа культуран тӀехьале, цун хоза оамалаш, эздел довзаш хиларо шерагӀа йовзийт къаман таронаш, хоалуш хул ший мехкара хьал, цун хозал»,-аьлар «Сердало» газетага Шолжерча культуран ЦӀен кулгалхочо Хьулахой Залинас.

«Лоаман оаз» яхача гойтаме баьхкарех хӀаранена, ше цу исторен цхьа дакъа долга хоалуш дар. Цар таро хилар къаман Ӏадаташ Ӏомаде, лораде къахьегаш болча нахаца къамаьл де, цар болх шерагӀа бовза.

Гойтаме венача моллагӀча сага таро хилар тайп-тайпара хьадаь къаман гӀирсаш довза, царга дӀадаха кӀада го, уж гӀирсаш хьадеш хьийга къа довза, шоай кулгашца цу тайпара болх бе Ӏомабала.