Георгиевски жӀарга виззача кавалера хетабаь гойтам
Мехках баьха хиннарий мемориальни комплексе дӀахьош ба гӀалгӀай къаман цӀихезача воӀа, ЗагӀенаькъан Султана Эскхийна хетабаь видеогойтам. Цу хана тӀема эггара лакхагӀа лоархӀаш хиннача Георгиевски жӀарга кавалер хиннав из. Российски императорски эскаре прапорщик волаш, декхараш кхоачашдеш хиннав вай къаман майра воӀ.
«ЗагӀенаькъан Султана Эскха Даьхен гӀулакха латташ, Даьхенцара безам боккха болаш хиннав. Дукхача ноахала дика масал хиннад цох. Цун вахар, тӀема никъ бовзийташ дола каьхаташ, сурташ да гойта оттадаьраш», - дийцар «Сердалога» из болх вӀашагӀбеллараша.
Таханарча тӀехьен Даьхенцара безам чӀоагӀбара тӀехьа лоархӀаме моттиг дӀалоацаш ба гойтам. Шоай даьша хьабена турпала никъ, селханара къаман истори довзаргда къонабарашта цу тайпарча моттигашка.
