Литературан классика Чахкенаькъан Капитона хетабаь гойтам дӀахьоргба вай мехка
20.09.2024 12:09
ГӀалгӀай литературан классика Чахкенаькъан Капитона 100 шу дизара хетабаь гойтам хьабийллар, мехкахбаьхача наьха Мемориальни комплексе. Лакха начӀал хиннача оазархочун, йоазонхочун кхоллама наькъах, цун вахарах дувцаш проект я цига дӀахьор.
«Гойтаме хьокха оттадаьд Чахкенаькъан Капитона байтий книжкаш, тайп-тайпарча ханашкара сурташ. ЛоархӀамеча каьхаташа хьахьокх, цун вахара денош кхолламах, къахьегамах дизза хиннилга, вай къаман литературе цу сага ший йизза моттиг дӀалаьцалга», - дийцар «Сердало» газетага гойтам дӀахьораша. Укх бетта 30-ча денга кхаччалца болх дӀахьош хургба гойтам. Чахкенаькъан Капитона вахар, цун къахьегама денош мишта хиннад ховргда цига хьабаьхкарашта.
