Гӏалгӏай мехка болх беш мехкахошта - СВО доакъашхошта хетабаь гойтам ба
Гӏалгӏайчен къам мехкахдаккхара дагалоаттама моттиге ба суртий-документальни гойтам, из хетабаьб Гӏалгӏай къаман турпала ӏадаташ дӏахо дӏахьош хилара.
«Ноахала турпала никъ» яхача экспозицена чудоагӏаш да цецвоаккхаш дола сурташ, цар дувц тахан а вай къонача тӏехьено гойтача турпалча гӏулакхех, шоай даьша лелабаьча сийдолча наькъ тӏа уж болхаш хиларах.
«Гойтам хетабаь ба вай таханарча лаьрххӏача операце дакъа лоацаш болча, Россе Донбасс лораеш дӏахьоча тӏем тӏа хьалхарча мугӏарашка латтача бӏухошта. Гойтамга хьажа хьабаьхкача наьха таро хургья; каьхаташ довза, бӏухой сурташ го, иштта цар истори довза, денал, майрал гойташ хьабоагӏача бӏухой тӏема никъ малагӏча халонех чакхбаьннаб ха. Укхаза иштта го йиш я СВО доакъашхой биографе материалаш, уж ба турпал яха цӏераш лелаераш, кхыдола совгӏаташ даьхараш.
Гойтамо довзийт турпалал - из духхьал исторе оагӏув хинна ӏац, из дийна ӏадат да, Гӏалгӏайчен ноахалгара, ноахалга доалаш хьадоагӏаш дола. Таханарча турпалхоша шоай масалца хьагойт Даьхе бахьан шоай вахар дӏадала кийча хилар.
«Ноахала турпала никъ» - из вай къаман лоархӏаме патриотически проект я, цо вайна хьалхадоаккх, турпалал дахаш хилар, даьша Даьхе лораеш, машара тӏехьа леладаь денала ӏадат дӏадахьа кийчабарий дегашка.
