Вайцига болх беш ба, «Къилбаседа Кавказа суртанчаш» яха гойтам
ГӏалгӀайчен паччахьалкхен исбахьален искусствай музее ший болх дӀаболабир «Къилбаседа Кавказа суртанчаш» яхача гойтамо, из хетабаьб гӀалгӀай къаман паччахьалкхен 100 шу дузаш хилара. Гойтам хьабеллаш, моаршал хоатташ къамаьл дир мехка Паччахьалкхен Председатела Сластенин Владимира. Цо белгалдир, цу тайпара кхетаченаш дӀахьош хилар лоархӀаме да, культураш дӀа-юха йовзара, аьнна.
«Мехка бахархой, хьаьший таро хилар Къилбаседа Кавказа доазон тӀа суртанчаша баьча боккхача балхага хьажа, цун мах оттабе, дукхача ханашка денз шоай дикагӀа дола сурташ гойташ хьабоагӀача художникий сийрда болх бовза, цар гойташ йола вахара оагӀонаш го.
Гойтаме хьабаьхкараш цецбаьлар иштта дукха, хоза суртанчаша баьча балхах, цар лакха мах оттабир тайп-тайпарча оагӀорахьара вахар гойташ цар къахьийга хилар чу а лоацаш. Иштта баркал аьлар Малхбоален Къилбаседа Кавказа филиала Паччахьалкхен музея болхлошта, цу тайпара хоза культурни тӀехьале го таро цар наха яларах», - аьлар «Сердало» газетага ГӏалгӀайчен культуран Министерствон зарбан болх лелабераша.
ХьалхагӀа тха газето хоам баь хиларах тарра, цу гойтаме чубоагӀаш ба 60 совгӀа тайп-тайпарча 44 суртанча баь болх. Уж да Къилбаседа Кавказа ХХ-ХХӀ бӀаьшерашта хетадаь, музея болхлоша лорадеш леладу балхаш.
«Къилбаседа Кавказа суртанчаш» яха гойтам хургба ГӏалгӀайче, ардара бетта 25-ча денга кхаччалца, безам барий таро я цунга хьажа.
