Коталонга бодача новкъа къахьийгарашта хетабаь гойтам хьабийллар мехка
«Сийлахь-боккха Даьймехка тӏом Россе къамий исторен чухьа» яхача мехка дӏахьоча халкъашта юкъерча ӏилман-практически конференце оагӏонцарча кхетаченашта юкъе лоархӏаме моттиг дӏалоацаш ба «Сийлахь-боккхача Даьймехка тӏема юкъе гӏалгӏаша лаьца дакъа - 1941-1945 шераш» яха паччахьалкхен музее дӏабихьа гойтам. Фашист вай лаьтташкара вохавеш, цо мел лаьрхӏар хоададеш духьаллаьттача вай къаман къонгех дувцаш ба гойтам.
«Къаман суртанчий тӏема деношта хетадаь балхаш оттадаьд гойтаме хьокха. Уж балхаш вай къаман вахаре лоархӏаме да. Гӏалгӏай бӏухоша Гитлер яхача бӏехача сага Кавказ дӏаяккха аьнна вӏашагӏделлар дохадеш гойтача майралах, моастагӏчун наькъаш тедаш тӏема аренашка ударий оагӏув хьаллоацаш, цӏагӏара шоашта могаш дола гӏо царна деш лаьттарий турпалча гӏулакхех дувц гойтамо. Белгалде деза, Котало яккхара тӏехьа Кавказа къамаша доккха, лоархӏаме дакъа дӏалаьцалга, Кавказа моттигашка фашиста шийна вӏалла а цаметтар духьалдаьннилга», - дийцар «Сердалога» паччахьалкхен музея болхлоша.
Иштта бола гойтам чӏоагӏа лоархӏаме ба къаьстта къонача тӏехьен вахаре. Тӏема аренашка деналах, майралах ца бохаш хьалхалаьттараша, цар гойтачох доаккхал деш, тамаш еш лаьттача къаман биззача къонгий цӏераш вай дегашка массахана яха еза.
