Наьсаре 2 млн сомах квартира йохкаш кхостабаь тийшаболх гучабаьккхар
Наьсарерча МВД тохкама болхлоша боккха тийшаболх кхостабаь ха яха кхалсаг лаьцар шахьаре. Из хоам «Сердалога» бир Ӏаьдала болхлоша.
Тохкама болхлоша белгалдечох, 2020-ча шера Ӏай Наьсарерча Новая оалача урам тӀа йохкаш квартира я, аьнна, хоам боаржабаьб цо, квартира ший доалахьа йоаццаше.
Ший йоаца цӀи оттаяь, квартира эца безам болаш кхестача лоалахарча мехкарча сагаца кхетаче яьй цо. Квартира йохкарца дувзаденнараш чӀоагӀдеш бола болх тӀехьагӀо чакхбоаккхаргба, аьнна, тешаваь 2 000 000 ахча хьийцад цо цунгара. Ахча каракхаьчача, бувзам хоадабаь яйна дӀаяьннай, хьоцара тӀадам ца боаккхаш йӀаьхий хила яьллар.
Массехк шера Ӏаьдалах лечкъаш лийннай из, дукха ха йоацаш, из лаца аьттув баьлар МВД болхлой. Цунна духьала гӀулакх хьадийллад.
Тохкама болх дӀахохьош латт. Харцача наькъаца даьккхача ахчанца хӀама тоаде яьллачунга, хӀанз шортта ха хургья ше даьча зулама уйла е.
