«Шахьара дика хьалаш» яха проект кхоачашъеш я
ГӀалгӀайче дӀахо дӀахьош я «Шахьара дика хьалаш» яха программа. Укх деношка, Наьсарен кхален кулгалхо Исмейланаькъан Ӏамархан хьежар Сурхо тӀа болх дӀа мишта бода, дӀадахача шера кхадж тессача хана, из юрт хьалхаяьлар, яхаш, дувц «Сердало» газетага моттигерча администраце зарбан болх лелабераша.
«Наьсарен кхален кулгалхо хьежар, Новая оалача урам тӀа болх мишта дӀахьу. ХӀанз цига асфальт буллаш латт. Болхлой кхы а дукха балхаш де дезаш ба, шоаш лаьрхӀар кхоачашде», - йоах хоамо.
«Из доазув вахара лоархӀаме да, Сурхо тӀара ишкол а амбулатори а цу даькъ тӀа хиларах. Цудухьа тхона лоархӀаме да Новая оала урам асфальт билла хилар», - аьлар Исмейланаькъан Ӏамархана.
Цу дийнахьа кхален кулгалхо хьежар хин турбаш хувцача балхага, нахаца къамаьл деш, цо ла дийгӀар кхыдола тоадара балхаш дӀадахьарах царна хетачунга.
