Зуламхо набахта чуеллар, тикашта къоал дарах
ГӀалгӀай Республикан Шолжа кхален судо соцам бир, моттигерча 41 шу даьннача яхархочунна, хьалхара лоацаш йоацача кхалсага кхел е. Укх наькъа из бехке ю къоал дарах; цо, Ӏеха а беш, товараш дӀакхухьаш хиннад тика чура, царех мах дӀа а ца луш, яхаш, дийцар «Сердало» газетага цу бокъонаш лораераша.
Хьалхара цу тайпара моттиг нийсъелар 2023 шера наджгоанцхой бетта. Цо, ахча дӀалургдолаш, 25 эзар сома маьха товар дихьар Шолжа кхален «Привоз» оалача базар тӀарча тика чура, шин кӀира ахча хьалургда, аьнна. Бакъда ше аьннар кхоачашдинзар.
Цунах тара йола моттиг нийсъелар 2024 шера: цу кхалсага «Айна» яхача тика чура 60 эзар сома парфюмери йихьар, иштта ахча дӀа а ца луш.
Из ахча хьадала лаьрхӀа цахиларах, тикан даьша полице хоам бир.
Судо дӀалаьрхӀар из хьалха суд яь хилар, иштта из цу чудах лаьца чуяьлла цахилар. Из бахьан долаш, цунна 4 шераи 6 беттаи набахта ялла ха техар.
