«Республикерча АПК моттигий тешаме оагӀув ба Россельхозбанк. Вайцига болх дӀахьоча юкъа, 16 млрд сом ахчанца гӀо даьд цо. Цу юкъера 12,1 млрд сом – АПК хьал тоадеш, 2,7 млрд - ханнахьа дӀакхухьаш бола болх чакхбаккха.

Йоккхача моттигашца санна, зӀамигача фермерски боахамашца а бувзам лелабу банко, доалара гӀулакх дӀадахьа гӀо деш.

Вай массане цхьа декхар да, юртбоахамера гӀулакх ма хулла тоадеш къахьегар, пайдане дола кердадараш юкъедахар, хӀаьта Россельхозбанк цу гӀулкхацара вай тешаме, беркате оагӀув ба тахан», - белгалдир Келаматанаькъан Махьмуд-Ӏаьлас. Къаьстта йоккха терко тӀайохийташ дийцар кхетаче, АПК гӀулакх меттадоаладаьрех.

Иштта теркаме лаьцар «Фермерий ишкол» яха Россельхозбанка укх шера гурахьа болх бе йолалургйола дешара проект. Юртбоахаме къахьега ловш болча наьха цу оагӀонцара кхетам, говзал лакхъеш хургья из проект. Паччахьалкхено, банко оагӀув хьаллоацаш хилча, дикка тоалургда аьнна хет бешамашка, хьайбашца, лаьттанца къахьегаш беркат доаржадерий гӀулакх.

Карарча хана, иштта дӀаходолхача шерашка «Юртара ипотека» яха программа юкъеяккха лерхӀ Россельхозбанко.