Гӏалгӏайчен цхьайола гӏишлош лелае дӏалургья нахага
Гӏалгӏайчен ӏаьдало лелаяра дӏалургья цхьайола гӏишлош, уж малагӏаш хургья чӏоагӏдаьд 2025 шера. Хьалхарчарца я - чӏоагӏача нувхий аре (ТБО) Илдарха-Гӏала, аьлар республикан доалахьен, лаьттан гӏулакха йолча Министерстве.
Проект кхоачашъеш я, Гӏалгӏай Республикан Паччахьалкхен 2024 шера маьтсела бетта 17-ча дийнахьа арабаьннача соцама чудоагӏаш, цо чӏоагӏбу уж гӏишлош лелаяра бола лостам. Гӏалгӏай Республика Кулгалхочун, Паччахьалкхен зарбан болх лелабераша яхачох, из проект федеральни хувцамашта чуйоагӏаш я, нувхаш лелаяра даькъ тӏа де лерхӏачох цаӏ долаш, из лоархӏаме гӏа ба, республике нувхашцара хьал лакхагӏча боараме леладарга боаккхаш бола.
Цул совгӏа, Гӏалгӏайче юххьанца юкъейоаккхаш я концессе хьал экологически даькъ тӏа доаккхаш. Цо хьаелл бизнес лелаяра керда оагӏонаш.
«Из гӏишло лелае дӏаялар бахьан долаш, таро хургья доалахьара инвестицеш юкъейоалае, лоаццача ханашка гӏишло хьалъе, дӏайолае таханарча заман балха оагӏув, деррига экологически дӏадехараш чу а лоацаш», - аьлар Гӏалгӏайчен доалахьарча хьала, лаьттан хаттарех волча министра Вешкаранаькъан Мурада.
Белгалду, лелае дӏаялара лаьрхӏа чӏоагӏъяь йола гӏишлош хӏара шера хургья, доал деча даькъ тӏарча ӏаьдало уж дӏаехаш хиларга хьежжа. Гӏишло цу юкъеяхьаро бокъо лу цунна доал дергдар харжа, «Тӏаьрг» яхача ГИСа даькъ тӏа гӏолла. Со тешаш ва, гӏишлош дӏа-юха луш хилара болх юкъебаьккхача, кхы юхадехаш хӏама а доацаш, уж сага лелае дӏаялар пайдане хургда сихагӏа, дикагӏа экологе декхараш кхоачашде, вахара коммунальни даькъ тӏа латта», - аьлар бувзама оагӏошка гӏолла Гӏалгӏайчен кулгалхочо Келаматанаькъан Махьмуд-ӏаьлас.
