«1994-ча шера бIаьстан тIехьарча бетта 17-ча дийнахьа, амар делар ГIалгIайчен президент хиннача Овшанаькъан Руслана, кадетски корпус хьаелла, аьнна. Цу моттиге Iомаду лоархIаме дешар, массайолча оагIонашцара кхетам лакхбу, маIача сагах яхка еза оамалаш Iомаю», - йоах цу гIулакха хетадаьча хоамашка. Хозача дешашца даькъала-бийцар кадеташ мехкадас Келаматанаькъан Махьмуд-Iаьлас.

«Кадетски корпус духхьала дешара моттиг хинна Iац, цигара арабувл шоай къаман сий лораде ховш, цун гIулакха уралатта кийча бола къаман бизза къонгаш», - белгалдир Мехкадас. Парламента хьалха латтача ТIумхой Мухьмада хьоахадир, Даьхен яхь йола къонгаш, лакха кхетам, къаман беркате Iадаташ лархIар, кадетски корпусера арабоалача нахаца хиланза даргдоацараш да, аьнна.

Республикерча тайп-тайпарча балха моттигашкарча наха дег тIара доагIача дешашца даькъалабийцар, цу лоархIамеча моттиге къахьегараш. Юххьанца из моттиг хьаеллача хана сатийсар, догдаьхар кхоачашхилар цу моттиге, Даьла къахетамца. Денал, яхь, сий долаш; эздел лораде ховш бола, йоккхача Россе лерхIам бергбола бизза къонахий хьабу цига кIаьнкех.