ТӀема операцена юкъе бейнача бӀухой дезалаш курорте бахийтар
23.07.2024 10:59
«Ӏарамхи» яхача курорте салаӀа бахийтар, тӀема операцена юкъе вахар хаьдача бӀухой дезалаш. Цу гӀулакха хьалхаэттараш ба «Даьхен Лорбой» яхача ганза моттигерча филиала болхлой.
«ЖӀайрахье бераш салаӀа дахийта дагадехар вахаре эшачунга хьожаш волча Ӏарапханаькъан Мухьмада. ТӀема операцен юкъе вахар хаьдача Келаматанаькъан Хьажмурда берий дегаш хьаста лаьрхӀар цо.
Лоаман хоза моттигаш йовзийташ, экскурси дӀахьоргья царца. Мушах баьча наькъ тӀагӀолла хохкабенна, ресторане пхьор диа шоай моттиге хьакхаьчар бераш», - дийцар тхога филиала кулгалхочун гӀонча йолча Новрбенаькъан Фаринас.
Белгалде деза, Келаматанаькъан шин виӀий Украине вахар хаьдалга - Хьажмурдеи цун воккхагӀча веший Ӏарбеи.
