Боккха болх дӀахьош тоаяьча ялх ишколо шоай наӀараш хьайийллар укх шера
Ишколашкара хьал тоадарах йолча федеральни программага гӀолла болх дӀахьош, куц тоадаьча ялх ишколо шоай наӀараш хьайийллар укх шера хьаьший тӀаэцаш. Из хоам «Сердалога» бир гӀишлон балхех йолча министерство.
«14 тайпара болх дӀахьош баьхкар болхлой, ма хулла сихагӀа йистебала гӀерташ. ТӀера тхов, уй хувцаш, пенаш тоадеш, кораш, наӀараш оттадеш, куц эргадоаккхаш къахьийгад цига. Иштта хийцай йӀовхал лоаттаю турбаш, тока саьргаш, цӀи яьлча хоам беш бола гӀирс, хин турбаш, кхыдараш. Царех я Лохерча Ачалкхера могашал эшаеннача берий дешара моттиг, Буро кӀалхара № 2 йола ишкол, Магасера «Марем» яха гимнази, Наьсарера №1 йола гимнази, Илдарха-ГӀалий тӀара № 1 йола гимнази. Беррига болх чакхбаккха хьахьожадаьр 650 млн совгӀа рузкъа дар», - йоах тхогарча хоамо. Ишколаш тоаеш йола программа вай мехка болх бе йолаенна ши шу да. 27 ишкол меттайоалаяьй республике цу юкъа. Ишколашкара хьал лакхача боараме хилар эггара лоархӀамеча гӀулакхех да. Берашта, хьехархошта доккха совгӀат да, дешара шу хоза тоаяь латтача ишколе дӀадоладе йиш хилар.
