Кагирхой воча гӏулакхашта юкъецаахийтара тӏехьа, боккха болх лоаттабу мехка
Къона тӏехьа цхьацца воча гӏулакхашта, оамалашта тӏехьа ца хилийта гӏерташ, лаьрххӏа болх ба тахан мехка дӏахьош. Укх наькъа Дола-Коарча № 7 йолча ишкола дешархошца дӏайихьар цу оагӏонцара кхетаче. Берашта хьалхадаьхар вахаре эггара чӏоагӏагӏа лораде дезараш. «Сердалога» из хоам бера Магӏалбика кхален администрацера.
«Кхетаче дӏахьош хиннараш бар терроризм яхача зулама духьале лоаттаеча кхела хьалхалатта Джамболатанаькъан Мухьмад, цунца цхьана болх беш вола Цӏечой Руслан, иштта шахьаре имамал деш вола Баьтаранаькъан Ибрахӏим. Кхувш латтача къонабарашта хьалхадаьккхар, терроризм яхача доккхача зуламо сага ираза никъ хоадабелга, цох хьокхавенна саг бекхам боацаш вусаргвоацилга.
Иштта царга дийцар вай бусалба динца наха зуламе хилар гетттара унзара лоархӏаш, кхел хургйола хӏама долга! Интернета оагӏонашка гӏолла къонабараш тувлбе, воча хӏаман юкъеоза гӏертарашца цхьаккха тайпара бувзаме вала, цар яхар хьаэца йиш йоацилга хьалхадаьккхар кхетаче», - йоах тхога бенача хоама тӏа. Моллагӏа тешаме ца хета хӏама ходелча, ӏалаьмате чехка ӏаьдала болхлошка хоам бе безилгах дийцар дешархошка.
Моллагӏа дола зулам юххьанца зӏамигачунгара дӏадоладеле даржаш долга; бӏехача, воча хӏаман никъ хоадабе безилга; ше леладечун уйла еш, харцача хӏаман тӏехьабаьнна леларашка ше ӏехавайта, воавайта йиш йоацилга белгалдир цига.
