«Лораде дуне!» яха экологически болам хургба ГIалгIайче
2024 шера бекарга бетта, ГIалгIайчен бахархошка хьежаш да цхьа доккха гIулакх. «Лораде дуне!» яха экологически болам дIахьош, республикан тайп-тайпарча юрташкарча хин йистошка лостам бе лерхI, яхаш, дийцар ГIалгIай Республике гIолла йолча «Хьалхарчар Болам» яхача ВДДМ зарбан болх лелабераша.
«Из вIашагIбеллараша лаьрхIачох, Наьсарен- Шахьара Наьсар оалача хин йисте, МагIалбик -Шахьара, Магас-Шахьара хишта йисте, Шолжа -Шахьарерча Шолжа йисте, лостам беш болх дIабахьа лаьрхIад, иштта Илдарха-ГIалан ГIалгIай Республикан 25 шу дизара цIерагIа салоIача парке а лостам бергба.
Цул совгIа, болама программанна чудоагIаш да ГIалгIай Республикан Iалама тароний, экологе Министерствон викалашца кхетаче дIаяхьар, иштта экосистемах дола ловзараш а чакхдахар», - аьлар «Хьалхарчар Болам» яхача ВДДМ бувзамех волча говзанчас Налганаькъан Рамзана.
Экосистеманна йоакхо е йиш йолаш ва хIаравар, цудухьа ба уж 12 шергара 17 шерга кхаччалца ха яьннараш цу юкъе дакъа лаца йиш йолаш. Цу гIулакха де дезар ши хIама да, къаьстта: будьвдвижении.рф сайта тIа дIаязвалар, иштта бекарга бетта 20 денга кхачале «Хьинар» яхача оагIон тIа дехар дитар.
