«Бера дог гIоздаккха» яха кхетаче дIайихьар вай мехка
ХIара шера дIакхухьаш йола «Бера дог гIоздаккха» яха беркате кхетаче дIайихьар МагIалбике. МагIалбик кхале чудоагIача дукха дезал болча фусамашкарча 300 бера совгIаташ дийкъар. «Сердало» газетага из хоам бир из гIулакх дIахьош хиннача Охценаькъан Ислама.
«Дикача гIулакхий дуне» яха гIо деш йола ганз я из беркате гIулакх дIадахьа дагадехар. Иштта из болам дIабахьара юкъе дакъа лоацаш хилар «Ихсан» яха ганз, «Дикача гIулакхий гIала» яха тоаба, «Кагирхой гIулакхех дола цIа», «Tooba» яха гIо деш бола оагIув.
ГIалгIай къаман Iадаташ, культура, гIалгIай мотт шийна мишта хов гойташ йолча викторино чIоагIа тоам бир берашта. Иштта КъорIа сураш деша ховрашта юкъе яхьаш дIайихьар. Боккхийбараш а бар цу моттигаца сакъердалуш, царна лаьрхIа лотореяш ловзадир. Ахчан совгIаташ кхаьчараш а бар царна юкъе», - дийцар тха газетага.
Белгалде деза, «Дикача гIулакхий дуне» яхача ганза хьалха латта Охценаькъан Зарема дуккхача шерашка из хоза гIулакх вIашагIдоллаш хьайоагIилга.
