«Берал лорадераш» яха кхетаче дIайихьар вай мехка
«Даьхе - вай» яхача федеральни проекта тоабо Наьсарерча № 3 йолча ишколе дIайихьар «Берал лорадераш» яха кхетаче. «Сердалога» из хоам цу моттигера бир.
ХIара шерарча тов бетта 27-ча дийнахьа, Россе дезду зIамагIа долча берашца болх беш барий ди. Из цIай хьаллоацаш, «Даьхе - вай» яхача проекта тоабо шоай деррига вахар ишколерча балха хетадаьча хьехархошца кхетаче йир берашта.
Хьаьшашта юкъе яр 42 шера хьалхарча классашкарча берашца болх беш хьайоагIа Iарчакханаькъан Радима. Дукха бераш да ше къахьегача юкъа хьехархочо арахийцараш. Лакхерча классашка дешаш барашка цо дийцар, эггара хьалхара хьехархо хIара бера вахаре йоккха лар юташ волга.
Филолог йолаш, 31 шера цу гIулакха лаьттача Малсаганаькъан Розас белгалдир; берашта, хьехархочун юкъера бувзам чIоагIа лоархIаме болга, уж вIаший кхеташ хила безилга.
ГIалгIай мотт, литература хьехаш йолча Гаьгенаькъан Тамарас дийцар 52 шу хьалха ше хьаийцача хьехархочун атта боацача наькъах, лоархIамедарех. Дуккхача шерашка ишколе къахьегаш латтача нахацара лерхIам лакха хила безилга хьалхадоаккхаш яр кхетаче.
