Сийлахь-боккхача Даьймехка тӀем тӀа котало яьккха 80 шу дизара хетаяь я из кхетаче. Из хоам «Сердалога» бир дешареи Ӏилмани гӀулакхех йолча министерствос. Бераш юкъе долаш дӀахьош хиннача цу кхетачен лоархӀаме хьаьший бар Халкъа Гуллама депутат Дарсиганаькъан Мухьмад, Юкъарча палата доакъашхо, МагӀалбикерча администраце кулгалхочун гӀонча вола ГӀантамаранаькъан ЯрагӀи.

Къаман истори массахана лорадеш дӀадахьа дезилга белгалдир гулбеннараша. ГӀантамаранаькъан ЯрагӀе дешархошта дийцар тӀема денош латтача хана бӀухошта гӀо деш, лоархӀаме дакъа дӀахьош лаьттача мехкахоех. «Санитаркаш хиннача къонача йиӀигаша шоай белаж тӀа бехкаш бӀухой моастагӀчун цӀера кӀалхара арабаьхаб. Къонахий санна денал гойташ лаьттаб уж а», - дийцар цо.

ТӀом лаьттача моттигашка тохкамаш деш, дисар хьалохаш йола проект кхелла къахьегача Дзейтанаькъан Беслана баркал аьлар Дарсиганаькъан Мухьмада. ТӀема деношта хетаяь байташ ешаш, дешархоша тӀема денош дагалоацаш, дӀайихьар кхетаче.