«Культуран болхлой кхетаче дIайолайир, РФ СТД моттигерча оагIон кулгалхоша, Москве дIахьоргйолча форуме республико дакъа лацарах дувцаш. Гайсананаькъан Султана теркалдаьчох, СТД моттигерча оагIон гIулакх тоадара тIехьа боккха пайда луш моттиг я из.

Кхетачен доакъашхой хиларах тарра, де лаьрхIачох, шоашта хетачох дийцар цар. Керттерчарех хилар, 2026-ча шера дездергдола Россе театра болхлой Союз хьакхелла 150 шу дизар. Иштта кхетаче дийцар гIалгIай паччахьалкхен 100 шу дизара хетаяь дIаяхьа езача театральни кхетаченах», - йоах тхогарча хоамо.

Белгалде деза, РФ культуран гIулакхах йолча Министерствон кулгал деча Любимова Ольгас хьалха хиннача кхетаче массехк шера бе беза болх бийца хилар. Къонача театральни болхлошта гIо дарах, кхоллама лакхерча дешара моттигашца бувзам лоаттабарах, иштта кхыдолча лоархIамечарех дийцар хьакима.