Машара Денна хетаяь кхетаче дӏайихьар вай мехка
24.09.2025 10:49
Машара Денна хетаяь «Эрсий дуне» яха кхетаче дӏайихьар, кагирхой цхьанкхетарий Цӏагӏа. Укх бетта 21-ча дийнахьа дездеш да из цӏай хӏара шера. «Сердалога» из хоам бир кхетачен хьалхалаттараша.
«Вӏаший массахана барт, цхьоагӏо, машар хиларах дийцар цига гулбеннача кагирхоша, юъарлен оагӏонцарча болхлоша, Магасерча администраце къахьегамхоша, мехкарча бе-беча къамий викалаша. Вӏаший барт хилийтара тӏехьа, массахана цхьана болх дӏакхахьа безилга белгалдир кхетаче», - йоах тхога кхаьчача хоамо.
Къамашта юкъе машар хургболаш, юкъедоаладича пайдане хургдараш белгалдир хьаьшаша. Кхувш латтараш массахана из хӏама хьаллоацаш хилийтара тӏехьа, вӏашгӏъехка проекташ йовзийтар Хьалха латтача къонабараша.
