Даьхенцарча безама, ГӀалгӀайче гIолла машинашца гобаьккхар
12.06.2024 13:58
Вай мехка белгало йола байракхаш тӀа а егӀа, итт машин лийлар цӀай дездеш, Наьсарерча урамашка. Машинашца чакхбаьлар ганза болхлой, лаьрххӀача операце доакъашхой, яхаш, дийцар «Сердало» газетага ганза кулгалхочун гӀончас Новрбенаькъан Фаринас.
«Из машинашцара болам наха гойтар, Даьхенах доаккхал деш хилар, Даьхенцара безам совбаккхар лоархӀаме долга хьалхадоаккхаш.
Вай ганза филиала шийна могар ду лаьрххӀа йолча операцен доакъашхой хьаллацара, цар хьашташ кхоачашдара», - йоах хоамо.
«Даьхен Лорбой» яхача моттигерча ганза филиала даькъалабийцар республикан беррига бахархой Россе денца! Иштта цар баркал аьлар, мехка майрача къонгашта, вӀалла шеко йоацаш, нийсхонна, машара тӀехьаэтта, Даьхе лораеш латтарашта.
