Гӏалгӏайче гойтар таханара криминалистий гӏирсаш
Российски Федераце Тохкама комитета 15 шу дузаш хиларца дувзаденна, Гӏалгӏай паччахьалкхен университета актови зале «Криминалистий гӏирсаш» яха гойтам хилар, яхаш, хоам бу «Сердало» газетага Гӏалгӏай Республике гӏолла йолча СКР урхаллено.
Пайда эца йиш йолча кхетачене баха хилар Россе Тохкама комитета кадетий класса дешархой, Цхьорой А.Д. цӏерагӏча Лоаман кадетий корпуса дешархой, иштта кхыбола нах.
«Тохкама урхаллен болхлоша довзийтар шоай истори, иштта РФ Тохкама комитета криминалистий керттера болх бовзийтар», - аьлар цигара баьча хоамо.
Тохкама болх дӏахьош лелабеш бола лаьрххӏа гӏирс гойтар, дийцар вай заман техниках, хьалех пайда эцаш, шоаш баьча балхах. Юшкова Людмила Валентиновна тохкама урхаллен болхлой даькъе къахьегаш я, цо довзийтар Российски Федераце Тохкама дешара моттигашкара гӏулакх. Дешархоша деннача лоархӏамеча хаттарашта хоадам болаш жоп делар.
Цу гойтаме дар тохкама урхаллен деррига истори тӏадола книжка. Цу тӏа дувцар болхлоех, вай республика дегӏайоалаеш цар шоашкара малагӏа дакъа юкъеденад.
Тохкама урхаллен криминалистикан даькъа говзанчас технически гӏирс - полиграф гойтар, из мичахьа лелабу а, цунца фу де таро я а, малагӏа декхараш из юкъебоаккхаш кхоачашду а дийцар. Иштта цига хиннача наха даькъалабийцар, РФ Тохкама комитет хьакхеллача Денца, цу урхаллен болхлой.
