ГӏалгӀай СК болхлоша даькъалавийцар, тӀема ханара къахьегамхо ТӀуманаькъан Саварбик
Сийлахь-боккхача тӀем тӀа Котало яьккха 80 шу дездеш хиларца дувзаденна; ГӏалгӀайчен вахархо, къахьегама ветеран Тӏуманаькъан Саварбик даькъалавийцар, яхаш, хоам бу «Сердало» газетага из дагадийхараша.
Къоаночо дийцар хала тӀема шераш лаьттача ханах, ше бӀухошта новкъостал деш хинна хилар дагаухаш.
«Са хилалехь дӀадоладале, малх чубузача кхаччалца къахьегар оаха, котало гаргайоалае гӀерташ», - аьлар ветерана.
Тӏуманаькъан Саварбика совгӀата «Сийлахь-боккхача Даьймехка тӀем тӀа Котало яьккха 80 шу» яха майдилг елар. СК эпсараша цунна баркал аьлар, цу халача шерашка иштта къахьегарах, ловца баьккхар, цунна могашал ехаш.
Ишттача боламаша новкъостал ду ноахалашцара исторически бувзам лелабе; хьалхадоаккх машара мах лакха болга ховш, хьамсара мохк безаш хила везилга.
