Республике адам дебаш хилар гӀадвугаш да
Геттара гӀадвугаш да вай мехкара адам дебаш латташ хилар. Перинатальный центре 2200 совгӀа керда бахархой малхабаьннаб, укх тӀехьарча пхе бетта, бераш деча моттиге. Из хоам «Сердалога» бир мехка кабмино.
«Бераш деча республикерча моттиге шоай хур ду, хӀара дезалхо могаш, маьрша волаш малхавалийта гӀерташ», - йоах тхогарча хоамо.
Иштта гӀадвугаш да, РФ хьал теркалдича, бераш довш хилара оагӀон эггара лохерча лагӀа тӀа вай мохк хилар. Вахара ха 79,4 шераш тӀа латт, адам дебаш хилар - 1000 сага юкъе 15,0. Цу гӀулакхо хьагойт, вай мехка боккхий дезалаш беркате лоархӀаш хилар.
Цу оагӀонцарча болхлоша теркалдечох, Россе кулгалхоша бера, нанна новкъостал лоаттадеш хиларо дикка тоадаьд из гӀулакх, иштта лоархӀаме да дарбанчей цу даькъера лораш, лакха говзал йолаш, шоай болх боаггӀача боараме дӀахьош хилар.
