ТIалатташ дола кредиторски декхар дIадаларца ювзаенна комисси хьаергья мехка
Наьсарен кхален моттигашка наькъаш тоадеш дIахьоча балхах дувцаш, кхетаче дIайихьар мехкадас шахьарерча администраце. Кабмин, мехкадаь, паччахьалкхен Администраци, шахьара администраци юкъе йолаш хиннача вIашагIкхетаре мехка кулгалхочо тIадиллар, ерригача республикан тIалатта йоал тIера дIаяккхара болх дIахьоргбола комисси оттае, аьнна. Къаьстта терко йир ер шу доладелча денз дIабихьача балха.
Муниципалитета хьалха латтача Исмейланаькъан Амирана белгалдир; йоалацара, йоал юкъе йоацаш хьатIаухаш дола рузкъа тахан 6%-га кхоачаш айденнад, аьнна. Мехкадас теркалдир, кхоачашдаь латтараш кIезига деце а, дIахо дIабахьа беза болх чоалхане болга. Инвестицей хьал айдергдолаш дийцар цо. Карарча хана мехка йоаржаяьй 500 млн сом рузкъа чулоацаш йола 60 проект.
«Муниципалитета декхар - бизнес дIаяхьа аьттув хургбараш доаржадар, бахархой цхьацца кхоачамбоацараш бахьан долаш кхыйолча моттигашка дIаухаргбоацаш ший гIулакх дIадахьар»,- теркалдир республикан Кулгалхочо. Цул совгIа, бокъо йоацача тайпара дIахьош дола гIулакхаш гучадоахаш, СВО доакъашхошта, иштта цар дезалашта терко еш, гIо лоаттадеш къахьегаш ба тахан мехка. Эггара ирагIа латтарех да тахан тIалатташ йола йоал дIаяккхар. ХьатIадоагIача шера Iан шоллагIча бетта 1-гIа ди тIакхачалехь; деррига декхараш тIера дIадаха аьнна тIадиллар мехка хьалхалаттачо.
«Къаьстта из гIулакх ма хулла сихагIа тоадаь даккха дезарех да. БоаггIаш бола болх дIабихьа, аттачахьа даккха деза цу оагIонцара хьал». Паччахьалкхен вице-премьер, рузкъанцарча оагIон министр волча Вешкаранаькъан Темарлана тIадиллар мехкадас; тIера декхар дIадаккхара тIехьа болх дIахьоргбола комисси оттае, аьнна.
«Кхален кулгалхоша шоай болх дика дIабихьаб. Сона гуш да тахан, администрацена хьалха латта Исмейланаькъан А. къахьегаш, ма хулла лакхача боараме болх дIабахьа гIерташ волга, хIаьта гонахьарча тоабан декхар – цунна гIо дар», - тIатехар вай Мехкадас.
