«Зоазо» яха кхоллама моттиг хьайийллай мехка
«Истинг» яхача кӀувсаш деча оагӀоно йиӀигашта лаьрхӀа вӀашагӀъеллача «Зоазо» яхача моттигага хьежар, культуран гӀулакхех йолча Министерствон хьалха латта Лаьнанаькъан Залина. 7 шергара 15 шерга кхаччалца йолча йиӀигаша шоай начӀал чӀоагӀдергда цига.
«Ассоциаценна кулгал деча Дзовранаькъан Танзилас Лаьнанаькъан Залинайна йовзийтар «Зоазо» яха проект. КӀувсаш хьадеш болча говзанчаша йиӀигашта Ӏомаергья цхьацца кулгаговзал. Боккха болх ба цу проектага гӀолла дӀабахьа лерхӀар», - дийцар «Сердало» газетага министерстве.
Культуран гӀулакхех йолча Министерствон кулгалхочо теркалдир, из мел боккха, хоза, беркате болх ба. ХӀара хӀаманга хьожаш, тамаш еш чакхъяьлар из. Тайп-тайпара говзал караерзаеш, къаман истореца дувзаденнараш дийндеш бола болх дӀакхухьаш, къахьегара тӀахьийхар цо йиӀигаш. КӀоарга овлаш дола вай исторецара лоархӀаме оагӀув ба из. Къаман культуранца дувзаденнараш дайна дӀадала йиш йолаш дац, хӀаьта вай хӀара денна къахьега деза уж довргдоацаш. Тахан цу оагӀонца дӀахьош латта болх чӀоагӀа тамашийна, хоза хет хьатӀаухача хьаьшашта, вай культура ма ярра дӀайовзийташ дола балхаш да уж.
