Токах доагӀа ахча дукхагӀа хьагулде аьттув боал, тӀехьарча хана
Йоагаеча токах доагӀа ахча, тӀехьарча хана, дикагӀа хьатела болабеннаб вай мехкара бахархой. 2024-гӀа шу дӀадоладелча денз, 1,3 миллиард ахча хьагулде аьттув баьннаб тока оагӀон болхлой. ДӀадахача шера хинначул 7,4% дукхагӀа да из, диста эттача. «Сердало» газетага из хоам бир Мехкадаь зарбан болх лелабераша.
«Тока оагӀон болхлоша тӀатеӀӀа къахьегаш, цхьаккха тайпара декхар дӀатела раьза боацарашта ток дӀахедаеш, ток лечкъаеш бахараш гучабоахаш, судага гӀолла тӀалатта декхар хьатокхийташ, иштта бахархошца ханнахьа хьаӀайна декхар дӀадалар ток боаггӀача боараме лоаттаяра тӀехьа мел лоархӀаме да дувцаш бола болх дӀакхухьаш, кӀеззига аттачахьа даьннад из гӀулакх», - белгалдир вай Мехкадас цу оагӀонцарча хувцамех дувцаш. Таханарча дийнахьа вай мехка тӀалатташ дола декхар 7,6 миллиард ахча да.
Белгалде деза, хан-ханнахьа болх дӀакхухьаш, хувца дезача гӀирсашта меттел кердадараш оттадеш къахьега дезилга. Мехкадас белгалдир, ханнахьа тӀалатта декхар дӀадаларо из хьал аттача доаккхилга, ток боаггӀача боараме хулийтилга, цудухьа дикка терко е еза цу гӀулакха бахархоша.
