Келаматанаькъан Махьмуд-Ӏаьла: «ТӀаргам- 2024» - Россе хьинар долча къоначар моттиг»
Укх бетта 11-ча денгара 15-ча денга кхоачаш, вай республике гулбелар Россе тайп-тайпарча моттигашкара хьинар дола къонабараш: студенташ, бизнесменаш, кхоллама оагӀон болхлой. «ТӀаргам - 2024» яхача доазон тӀа цар дӀа-хьа эцаргда вӀаший накъадаргдараш, кхоачашде лаьрхӀараш. Дуккха хӀама дӀадоладе йиш йола юхьиг я из.
Мехкадас Келаматанаькъан Махьмуд-Ӏаьлас белгалдир, из кхетаче кагирхой вахаре лоархӀаме моттиг дӀалоацаш йолга: «Укх шера кхетачено гулваьв Россе 35 моттигера 200 совгӀа саг. Цо хьагойт кхетачен гӀулакх мел даьржад боккхача мехка». Цунна чудоагӀараш дукха да. Лакхача говзанчий лекцешка ладувгӀа, интерактивни сессешка, кейс-чемпионаташка, проектни балхашка дакъа лаца, иштта дукха хӀама довза аьттув ба доакъашхой.
Кхетачен керттера темаш:
Туризм йоаржаяр: керда технологеш, хьаьший тӀаэцарца дувзаденнараш, тахан массанахьа даьржадараш.
Тоабанца болх дӀабахьар, боаггӀача боараме къамаьл де хар, проектий гӀулакх ма дарра дӀадовзийтар.
ӀТ–программировани: керда технологеш йовзар, мобильни оагӀонаш, веб-сервисаш йоаржаяр.
«ТӀаргам-2024» яхар мехка хьал тоадара тӀехьа къахьегаш болча, лакха начӀал долча, доккхача гӀулакхашка кхача гӀертача наьха моттиг я. Цо аьттув лу кагирхошта, шоаш санна хӀама хьаде гӀертараш бовза, кердадараш дӀа-хьа эца, лаьрхӀар кхоачашде.
Къонабарашта кхы а боккхагӀа низ лургбола, цар кхетам лакхбергбола моттиг я из.
