«Хьалхара кхетаче дӀайолайир Жайрахьарча Лаьнанаькъан И.С цӀерах йолча ишколера-берий бешара. Ерригача Россе къамашта юкъерча кагирхой союза хьалха латтача Оздой Инала лакхерча классашкарча берашта дийцар, наркомани яхача доккхача зуламо доаржадеча воча хӀамаех, адамий вахар цо толхадеш хиларах. Иштта теркалдир, вай мехка из бӀеха зулам мел гаьнадаьннад», - йоах тхогарча хоамо.

МагӀалбикерча № 18 йолча ишколе дӀадихьар селхан цу мугӀарера вӀашагӀкхетар. «Rehab» яхача тоавала гӀо деш йолча моттига кулгал деча Оздой Исламагара берашта хайра, мел ийрчача, унзарча хьале хул наркотикех хьокхавеннача сага гӀулакх.

«Наркомани яха во вӀалла ца хиннача беса айденнад вай мехка, Россе эггара унахцӀена барех лоархӀаш ба вай кагирхой. Воча хӀаман духьалара тӀом эггара хьалха цӀенъюкъера дӀаболабе беза. Таханарча вай лерхӀамашка, гӀулакхашка хьежжа хургья вай кхоане, цудухьа, зулама никъ хоадабеш, цунна тӀехьабараш гучабоахаш, царна доаггӀаш дола таӀазар лоаттадеш, лораде деза вай къам бӀехача хӀамах», - дийцар Оздой Инала.