«Спецы» яха кино доаккхаш ба вай республике
ЖӀайрахьа кхале «Спецы» яха кино доаккхаш ба тахан. «Триикс Медиа» яхача кино доаккхача компане, РЕН ТВ телеканала юкъара хьалхара цхьана дӀахьош проект я из.
«Эггара хьалхара болх дӀаболабир Лаьжге яхача юрта. Цунга хьожаш хилар тха балхара новкъостий, культуран болхлой, иштта цигара бахархой. Хьагучох, кино массанена дезалургдарех да. Цига дакъа лоацаш яр культуран гӀулакхех йолча Министерствон кулгалхочун гӀонча йола Куртой Макка, ЖӀайрахьа кхален кулгал деш вола Лаьнанаькъан Ахьмад, кхален администрацера болхлой, иштта цу юртарча культуран цӀен викалаш», - дийцар «Сердало» газетага культуран цӀенна кулгал деча Хутенаькъан Ӏамархана. Цун цӀа, ков киноца бӀаргагургда вайна.
Сериал оттаяьй Россе ФСБ болхлой вахаре нийсденна хӀамаш кӀийленга даьхка. Хьажархошта гургда, тайп-тайпарча моттигашкара шоай операцеш цу оагӀонцарча болхлоша мишта дӀакхихьай. Керттера турпалхой – ЦСН оагӀонцара болхлой. Шоай гӀулакх кӀоарга довзар, болх боаггӀача боараме дӀабахьар мишта хила деза гойт цар цу сериале. Из тайпара болх вай мехка хьалхара дӀахьош бац. СОБРа доакъашхой балха хетадаь «Вай спецназ» яха детективни кино доаккхаш хиннаб вай мехка хьалхагӀа.
ЖӀайрахьа кхален моттигаш кино даккха чӀоагӀа паргӀата, хоза хиларал совгӀа, мехкахоша шоай болх хьаллоацаш, могаш дола новкъостал лоаттадеш чӀоагӀа раьза ба сериал яккха баьхкараш.
Белгалде деза, из проект вай мехкадас Келаматанаькъан Махьмуд-Ӏаьлас хьаллоацаш йолга, иштта моттигерча культуран гӀулакхех йолча Министерствос эшаш дола гӀо лоаттаду. Из бахьан долаш, вай мохк кинопроекташ йоаржаяра тӀехьа аьттув болаш, паргӀата ба. Вай культуран, туризма оагӀошцара хьал а тоаду цу гӀулакхо.
