ДӀадолалуш да, Магасерча «Ишкол 21» яхача моттига дешар
Тахан «Ишкол 21» яхача Магасерча дешара моттиго ший керттера болх дӀаболабу, цо ший наӀараш хьайийллар 145 начӀал долча берашта, кхоаненга кхача гӀертача студенташта, яхаш, дийцар «Сердало» газетага ГӀалгӀай Республикан Кулгалхочун зарбан болх лелабераша.
«Из вай республикан лоархӀаме ди да, хӀана аьлча «Ишкол 21» - из дешара моттиг хинна Ӏац, из я хургбола ӀТ-говзанчаш тахан хила болалуш йола моттиг.
ДӀайолаяьча хана денз, цу ишколе дӀачуденнад 4 920 дехар, царех 915 саг чакхваьннав, овсаре гӀа болчар тоаба хоржача хана. Из да, таьрахьий технологешца наьха хьашт хилар, ГӀалгӀайчен кагирхошта юкъе уж совбоалаш латташ хилар.
Цу ишкола дешархоша Ӏомадергда таханарча дийнахьа ца хайча яргйоаца программировани, лакхъергья цу даькъ тӀара говзал. Иштта цар дӀахьоргда кхаь бетта дола Ӏомабалар. Цо а таро лургья царна шоай низ бовза, лаьрхӀачунга кхача», - аьлар Келаматанаькъан Махьмуд-Ӏаьлас, цу лоархӀамеча балхах дувцаш.
Цо баркал аьлар из проект хьаллацарах, гӀо деш волча Гуцаранаькъан Микаила, иштта, ГӀалгӀайчен хоамий технологеш дегӀайоалаяра шийгара дакъа юкъеденача хӀара сага.
Келаматанаькъан Махьмуд-Ӏаьлас ловца баьккхар цу «Ишкол 21» яхача гӀишлон чу деша отташ болчарна, цар аьттув хилар ловш долча дешашца. Цо белгалдир, кагирхой цу наькъ тӀа деша отташ хиларо хьагойт вай республика дегӀаяра, цун хургдолчунна юкъедахьаш дола доккха дакъа из хилар.
