Бокъо йоацаш паспорт дӀадаларах дола гӀулакх тохкаш да
44 шу даьннача вай мехкахочунна духьала гӀулакх хьадийллад республикерча прокуратуро. 1-ча даькъа 285-ча статьяга хьежжа, бехктокхаме озаш я из кхалсаг тахан (ший балха тӀа бокъо йоаца гӀулакх дарах), иштта РФ УК 3-ча даькъа 272 статьях а бехк бу цунна (цу моттиге балха йолаш, ший аьттув хиларга хьежжа, Ӏаьдала бокъонца лорадеш дарашта тӀакхачар, из бокъо йоацача тайпара доаржадар).
МВД, Россе УФСБ болхлоша гойтачох хьадийллад гӀулакх. «Сердалога» из хоам бир цу моттигера.
«Тохкама болхлоша гучадаьккхачох, 2021-ча шера ахкан шоллагӀча бетта, ОМВД миграце гӀулакхаца дувзаденнарех болча оагӀон кулгалхочун декхараш цхьан юкъа кхоачашдеш йолаш, ший гаргарча сага, из ваь ха харцахьа оттаяь, паспорт деннад цо. Цун ханага кхаьчараша дакъа лаца йиш йоацача спорта яхьашка дакъа лаца гӀо даьд цо цунна ишттача наькъаца», - йоах хоамо.
Бакъдоацараш яздаьд цо Ӏаьдала бокъонца лорабеш болча компьютерни хоама оагӀон тӀа.
Магаса кхален суде, дӀахьожадаьд прокурора из гӀулакх.
