Бокъо йоацаш болх беш хинна АГЗС дӀакъайлар судо
27.06.2024 10:12
Прокуратуро чубеннача лоткъамах, болх бе бокъо йийхкар судо машинашка газ чуйоттача станцена. Из хоам «Сердалога» бир Ӏаьдала болхлоша.
«Мехкарча тайп-тайпарча моттигий кхерамзлен хьал тохкаш, болх дӀабахьар Ӏаьдало дӀадехача беса дий хьожаш хилар Наьсарера прокуратура. Гучадаьлар, Бакински оалача урам тӀара АГЗС Ӏаьдало енна бокъо йоацаш болх беш йолга. Лицензи хиллалца из болх бе бокъо царна ехкаш дола каьхат чуделар Магасерча суде», - йоах хоамо.
Судо хьаллаьцар, лицензи йоацаш цар болх бе бокъо ца хилар. Наьха кхерамзлен хьал лораде дагахьа, дӀакхухьаш ба из тӀахьожама болх массайолча моттигашка.
