ТӀема доакъашхочун кӀаьнка, дарба де гӀо дир республике
Украинерча тӀема доакъашхочун могаш воацача кӀаьнка дарба де гӀо дир «Даьхе лораераш» яхача ганза моттигерча оагӀоно. Из хоам «Сердалога» бир цу моттига кулгалхочун гӀонча йолча Наурбенаькъан Фаринас.
«Царгашта дарба деча Магасерча моттиге, ший кӀаьнкаца нийсденначох дийцар тӀема операцен доакъашхо волча Ӏаьленаькъан Азамата. Царг дӀаяккхийта вигача кӀаьнка оттаяь аргӀа 75-га кхоачаш я, бакъда ДЦП дола кӀаьнк иззал йолча хана лазар ла могаргдарех вац», - дийцар тхога.
Балхага хьожаш вола Хаьшанаькъан Мухьмад оарцагӀваьнна, аргӀа йоацаш, дӀатӀаийцар кӀаьнк. Белгалде деза, 2022-ча шера денз, контрактах тӀема декхараш токхаш лаьтта Ӏаьленаькъан Азамат, дикка лозаваь волаш, дарба деш хиннилга. ДегӀа могашал эшаяларах, Харьковера цӀавайтав из, «Денал хиларах» яха майдилг енна.
