Колледже дийша баьннарашта, болх бе моттигаш Ӏалашъяр лоархӀаме да
Дешара гӀулакхех йолча мехкарча министерствонна Мехкадас Келаматанаькъан Махьмуд-Ӏаьлас тӀадиллад, колледжашка дийша арабаьннарашта болх бе моттигаш Ӏалашъяр. Мехка кулгалхочо белгалдир; тахан вай мехка эшаш йола говзал Ӏомаяра тӀехьа дешаш хилар геттара лоархӀаме да, аьнна. Цудухьа, лакха тӀахьожам лоаттабеш, говзал Ӏомаяь арабаьннарашта терко еш, дӀабахьа безаш болх ба из.
«Цу оагӀонца дикка толам баккха аьттув баьннаб тха. Дийша боаллашехь болх бе арабоалараш хӀара шера дукхагӀа хулаш латт: 2021-ча шера 54% тӀа латтар из гӀулакх, 2022-ча шера - 62% тӀа, 2023-ча шера - 63% тӀа.
Вай мехкарча малагӀча моттигашка болхлой эш тохкаш, дийша боаллашехь, кагирхой дӀа-хьа хьожабеш бола болх ерригача колледжашка дӀахьош хиларах хьахинна пайда ба из», - язду вай Мехкадас ший телеграм-оагӀон тӀа.
Республикерча паччахьалкхено укх шерарча бӀаьстан шоллагӀча бетта чӀоагӀо яьча картага хьежача, колледжашка дийша баьнна кагирхой балха увттабар лоархӀамеча, лакха терко тӀаяхийта езача декхарех да. 2030-ча шерга кхаччалца, дӀабахьа беза цу мугӀарера болх ба каьхата тӀа белгалбаьр.
