ГӏалгӀай мехка мах бара а йоал яхара а гӏулакхаш тоадергда
Республикан Ӏаьдало мах бара даькъ тӀара хьал техкар, яхаш, дийцар «Сердало» газетага мехка кулгалхочун зарбан болх лелабераша.
Белгалду, республикан мах беча даькъ тӀара хьал да 50 млрд сом, из кхы а дегӀадоагӀаш да, бакъда цунга хьежжа дац йоал ялара гӏулакх. Цо хьагойт, мехка бюджет дикка совъяккхара таронаш йолга.
«Декхар оттадаьд, из болх тоабе, мах бара даькъ тӀа болх къаьгга лелабе. Республикан Паччахьалкхено тохкаргья доал дара даькъ тӀарча кулгалхошта лаьрхӀа КРӀ оагӀув, къайлагӀа лелабеш бола болх гучабаккхара»,-аьлар ГӏалгӀай Республикан кулгалхочо Келаматанаькъан Махьмуд-Ӏаьлас, цу лоархӀамеча декхарах дувцаш.
Карарча хана, цу хьакъехьа болх дӀаболабаьб. Иштта боахамашта юкъера тоабаш а хьежар 1 800 мах беча моттигашка, царна гучадаьлар кхоачамбоацараш. Цу тӀа кхы а дегӀадоагӀаш да, кара ахча доацаш хӏама эца таро хилара хьал а; иштта базарашта, мах беча цӀеношта, хьоалчагӀан моттигашта регистраци ю.
Из деррига а, Макшарипа Махьмуд-Ӏаьлас яхачох, цӀена экономика дӀаяхьара деш да.
«Тха керттера декхар да - йоалах хьалуш дар совдаккхар. Республике мах бара хьал 50 млрд сом хилча, йоалах хьабоала пайда 1 млрд сом хила беза. Из ахча – ГӏалгӀайче дегӀайоалаяра тӀехьара тӀа бола пайда ба», - аьлар Мехкадас.
Цо белгалдир, деррига а законо дӀадеххача тайпара леладе дезилга, цунца цхьана Ӏалашо еш бюджете хьачудоагӏачун. Из болх моттигерча Ӏаьдало дӀахо дӀахьоргба.
