Бокса урокаш елар цӀихезача спортсмена
18.06.2024 09:19
Укх деношка, Наьсарен боксах йолча олимпийски тӀехьален ишкола даькъ тӀа гулбелар из спорт езаш бола нах. Цу халача латара еррига оагӀонаш гойтар ГӀалгӀай мехка хьоашалгӀа венача Джонсон Кевина, яхаш дийцар «Сердало» газетага ГӀалгӀай Республикан бокса Федераце зарбан болх лелабеш йолча ГӀаппархой Аишас.
«Вай мехкарча вахархочун хьисап тӀаийцача профессиональни спортсмена къонача латархошца, цар хьехамчашца болх дӀабихьар. Цо гойтар керттера лоархӀаш йола приемаш, иштта хьехар дир дӀаболалуш болча боксёрашта.
Юххера а, кхетаче йоалаш дагалоаттама сурт даьккхар», - аьлар хоамо.
ХьалхагӀа «Сердало» газето яздаьдар, ГӀалгӀайчен физически культуран, спорта Министерство, бокса Федераци Джонсон Кевинца говзанч-хьехам дӀабахьа лерхӀаш хиларах.
