Наркоманена духьала къовсам чӀоагӀбергба республике
РФ МВД министра Колокольцев Владимира кулгал деш йолча наркоманена духьале еча паччахьалкхен комитета кхетаченна юкъе видеобувзамга гӀолла дакъа лоацаш хилар вай Мехкада Келаматанаькъан Махьмуд-Ӏаьла. Из хоам «Сердалога» бир Мехкадаь зарбан болх лелабераша.
«Кхетаче дийцар, тахан наркомани яхача зулама тӀагӀолла бовш латтарех. Цу бӀехача гӀулакха духьала лоаттабе безача къовсамах, эггара хьалхарча аргӀагӀа де дезарех», - белгалдир вай Мехкадас.
Наркотикашца вувзавенна вай мехка соахка гучаваьннараш 651 саг ва. Цул хьалха дахача шера хинначарел дукхагӀа ба уж. Наркотикаш дегӀо ца ловш, вахар хаьдараш - 13 саг.
Вай Мехкадас белгалдир, вайх хӀаравар цу доккхача зулама духьале еш, могаш бола къовсам лоаттабеш, цу дохьажаца бувзам лелабераш гучабоахаш, хила везилга. Вайна массанена хьалхашка латташ лоархӀаме декхар да из тахан!
Кхувш латташ йола тӀехье цу бӀехача гӀулакхах лорае еза вай, тӀаккха мара хургьяц вай кхоане сийрда!
