Дика дегӀадоагӀаш да лоӀамхой гӀулакх
ГӏалгӀай Республике дика дегӀабоагӀаш ба Даьла духьа гӀулакх деш леларий болх. ЛоӀамхой тароний центро баьча тохкамах ховш да вай мехко 18-гӀа моттиг яьккхалга цу балха тӀа. Из хоам «Сердало» газетага ГӏалгӀай Республикан кагирхой политикан, туризма Министерствос бир.
«Юкъарча балха карагӀдаьнначун жамӀа дир Москве, хӀара шерара #ВАЙЦХЬАНА яха кхетаче дӀахьош, цу майдан тӀа гулбелар 20 эзар саг кагирхой, уж баьхкабар 40 мехкара. Иштта хьакхайкайир, ГӏалгӀай Республикан кагирхой политикан, туризма Министерствос, шийна чуйоагӀача тоабашца цхьана кхоачашъяь йоккхий проекташ», - аьлар тхога хоам баьчо.
ГӏалгӀайчен викалех шийтта саг вахар говзанч-хьехамаш дӀахьоча, Россе хьалхале лелаеча говзанчаша деча къамаьлага ладувгӀаш хилар уж. Цул совгӀа, цар таро яр дика гӀулакх а гойта, лаьрххӀача «Дика.ру» яхача майдан тӀа шоаш даьха баллаш алсамдаха.
