ТӀема операце вахар хаьда росгвардеец дагалаьцар мехка
СВО вахар хаьда Наьсарерча полка росгвардеец хинна Малорой Адам дагалаьцар Йоккхача Ачалкхе. № Ӏ7 йолча ишколе цун хетадаь «Турпала парта» хьацийллар. Из хоам «Сердалога» бир цу моттигера.
Кхетаче гулбеннабар бӀухочун хьехархой, гаргара нах, новкъостий, иштта кхыбараш а. ТӀема новкъосташа хозача дешашца вийцар деналах визза хинна Адам. Хьехархоша белгалдечох, дешара тӀакхувш, кхоллама балхашца безам болаш, хьалкхийра из.
«Халача деноех чакхваьле, хьахул турпал, атта дац из цӀи яккха. Вай дегаша бицбе йиш яц деналах бизза хинна къаман майра къонгаш. «Турпала парто» тӀехьа тӀабоагӀарашта гойтаргда, Даьхен гӀулакхе лаьттараш укх ишколера арабаьнна къонгаш болга», - белгалдир Росгварде полка кулгалхочун гӀонча волча Мутелимов Рамзана. РФ Президента амарца Денала орден елар Малорой Адама.
