Фольклора ЦаӀ дола ди дӀахьош, хӀама тегарах бола говзанча хьехам белар
ЦаӀ дола фольклора ди ший тайпара къаьга хилар, Кердача Редантерча къонача говзанчашта. Моттигерча культуран ЦӏагӀа дика пайда луш йола говзанча хьехам дӀабихьар гӀалгӀай Ӏадатех дола дувхар тегарах бола говзанча хьехам дӀахьош. Цига гулбелар бокъонца из искусство езараш.
«Тай-маха» яхача маха баккхара йолча кружока кулгалхочо Дзовранаькъан Хаьде йиӀигашта наӀараш хьайийллар тамашийнача къаман культуран. Цун дувцаро кхоачавир дӀаяхача ханашкарча Ӏадатий дувхар тегара балхага, вай даьй дагалоаттамга», - аьлар «Сердало» газетага культуран салоӀама боахама кулгалхочо Хоаной Марета.
Говзанча хьехам дӀахьош, керттера терко тӀаяхийтар Ӏадатий тегарашта дошо а дото а хьоасий дахийтара. Кхетачен доакъашхошта ховш хилар, хӀара догам ше-ший белгало йолаш долга, цо хьагойт гӀалгӀай къаман культуран а син а тӀехьален мах бараш.
Кхоллама болх дӀахьош безам тӀабахар цига гулбеннарий массане а. Говзанчас кулгал а деш, йиӀигаша хьакхеллар къаман гӀирса цхьацца йола оагӀонаш, цар шоай деррига хьинар дӀалу цу балха, хӀана аьлча дег чура из беш хиларах. Царна хоза хет къаман догама говзал Ӏомаеш.
Говзанча хьехам дӀахьош, цига еш хинна хӀамаш бокъонца бола искусствай кхоллам хилар, цунга гӀолла го йиш я гӀалгӀай къаман культуран белгалонаш.
