Эса тӀарча хих пайда эцаргбола гӀишло йолае лерхӀ укх шера
24 сахьата 100 эзар совгӀа кубометр хий лоаттадеш хургйола моттиг хьалъе лерхӀ укх шера Эса тӀа. Республике дукхача хана денз латта хицара кхоачамбоацараш дӀадоахаргда цу проекто. Из хоам «Сердалога» бир мехкадаь зарбан болх лелабераша.
Из гӀулакх Россе Президента тӀакхухьаш, Федераце Совете дувца увттадеш, 2021-ча шера денз, хьабахьаш ба цу оагӀонцара болх. Тахан соцам баьб, хин хьал меттадоаладе; 11, 5 млрд сом ахча хьахьожадеш.
«Белгалде лов, Федераце Совета спикер йолча Матвиенко Валентинас из проект хьаллаьцалга цу хана. Цу гӀулакха ахча хьакъоастадара тӀехьа чӀоагӀа лоархӀаме хилар из», - белгалдир вай Мехкадас Келаматанаькъан Махьмуд-Ӏаьлас. 2023-ча шера хьакимаша Путин Владимирга дехар дир, из ахча сихагӀа хьадалийта аьнна. Вице-премьер волча Хуснуллин Марата тӀадиллар цу гӀулакхага хьажар. Иштта, 2027-ча шера лаьрхӀа, 3,916 млрд сом ахча хьакъоастадаьд федеральни оагӀоно. Цо гӀо дарах, болх укх шера дӀаболабергба. Республике латташ дола эггара доккхагӀа дола кхоачамбоацараш юстардоахаргда водозабор хьалъяро, аьнна; белгалдир вай Мехкадас:
«Проекта декхар - бахархошта цӀена, экологически оагӀонга диллача хила дезача тайпара хий лоаттадар. Наьха унахцӀенон, паргӀатон хьал теркалдича, эггара керттера да из».
Белгалде деза, хий леларгдола турбаш чуйоахкаргйола болх Оалкамара Илдарха-ГӀалий тӀарча насосни станцега кхаччалца хинна ца Ӏеш, МагӀалбике кхаччалца дӀахьоргболга. Иштта цу кердача гӀулакхо хий лоаттадергда Галашка, Мужеча. Ерригача проекта мах 12, 9 млрд сомага кхоачаш хургба. 2030-ча шерга кхаччалца, федеральни оагӀоно ахча хьателарга хьежжа дӀахьоргба из болх.
