Хьунаш меттаоттаяра болх дӀаболабе лерхӀ ахкан хьалхарча бетта
08.04.2025 10:16
50 гектар долча доазон тӀа хьунаш меттаоттаяра бола болх дӀахьоргба вай мехка, ахкан хьалхарча бетта. «Хьунаш лораяр» яхача федеральни проектага гӀолла «Росхьулораяр» яхача филиала дӀахьоргба из болх. Из хоам «Сердалога» бир Ӏалама гӀулакхех йолча министерствос.
«Хьу йоаца моттигаш лакхера зувш, аренашка болх дӀахьош хургба цу оагӀон къахьегамхой. Хьун, арений хьал ма дарра довзаргдолаш дӀахьош лоархӀаме болх ба из», - йоах хоамо.
Керттердар - хьунаш меттаоттае еза доазош белгалдар. Карарча хана из болх чакхбаккха эшаш йола кийчо еш ба филиала къахьегамхой. Ахкан хьалхарча беттагара ахкан тӀехьарча беттага кхаччалца, дӀабахьа безаш ба из болх.
